CHECKER SA ISANG GULAYAN, SINAKSAK PATAY

Kalibo – Patay ang isang checker sa gulayan sa Kalibo Public Market matapos saksakin bandang alas 12:00 kaninang hatinggabi sa Barangay Tigayon, Kalibo.

Nakilala ang biktimang si Rolly Montoya, 37 anyos, tubong Camaligan, Batan at residente ngayon ng Tigayon, Kalibo, habang pinaghahanap pa ng mga pulis ang suspek na si Anthony Villorente, sa legal na edad, tubong Oyang, Libacao, at nakikitira sa bahay ng kanyang tiyuhin sa Barangay Tigayon.

Base sa inisyal na imbestigasyon ng Kalibo PNP, sinaksak ng suspek sa likod ang biktima sa hindi natukoy na dahilan.

Kàagad dinala sa provincial hospital ang biktima, subalit binawian ng buhay bandang alas 3:00 kaninang madaling araw.

Patuloy pa ang imbestigasyon ng mga pulis sa insidente, kasabay ng kanilang pagtugis sa salarin.

Samantala, depensa ng suspek, na tinambanga siya ng grupo biktima at hinampas sa ulo habang naglalakad.