Lalaking nagbasag ng bote, sinaksak

Sugatan ang isang lalaki matapos saksakin bandang alas 9:45 kagabi sa Daguitan, Banga.

Nakilala ang biktimang si Joel Rebustes, 47 anyos, isang habal-habal driver ng Poblacion, Madalag, habang arestado naman ang suspek na si Astrophel Inosanto ng Daguitan, Banga.

Sa inisyal na imbestigasyon ng Banga PNP, nag-iinuman ang suspek at dalawa pang kasama sa isang tindahan nang dumating ang biktima na nasa impluwensiya ng alak.

Bigla na lamang umano nitong kinuha at binasag ang dalawang bote doon, rason na nilapitan at sinita siya ng suspek.

Kasunod ng pagsuntok ng suspek sa biktima hanggang sa nagpangbuno ang dalawa kung saan nasugatan sa ulo ang suspek.

Subalit bumunot umano ng kutsilyo ang suspek at sinaksak ang biktima sa kaliwang bahagi ng tiyan dahilan upang isugod ito sa ospital.

Samantala, sinasabing sa Madalag hospital na naabutan ng mga police at naaresto ang suspek matapos magpagamot doon ng kanyang sugat sa ulo.

Pansamantala siyang ikinustodiya sa Banga PNP Station para sa karampatang disposisyon.