Tricycle driver timbog sa pagtutulak ng droga; 18 sachet ng shabu narekober

Arestado sa panibagong buybust operation sa Brgy. Libas, Roxas City ang isang tricycle driver kung saan nakuha sa kanya ang 18 sachet ng pinaniniwalaang shabu.

Kinilala ang suspek na si Mitchelle Chiyuto, 37-anyos, may-asawa, residente ng Brgy. Lawaan sa lungsod ding ito.

Naaresto si Chiyuto sa ikinasang operasyon hapon ng Biyernes, Marso 6 ng mga tauhan ng Capiz Provincial Drug Enforcement Unit.

Tinatayang limang gramo ng “shabu” ang narekober sa suspek o katumbas ng Php30,000 market value.

Narekober ng kapulisan ang Php1500 boodle money at isang Php500 genuine money na ginamit sa buybust, cellphone ng suspek at isang container na walang laman.

Ang suspek at ang mga narekober na item ay nasa kostudiya ngayon ng PDEU para sa kaukulang disposisyon.

Sasampahan ang suspek ng kasong paglabag sa Republic Act 9165 o Comprehensive Dangerous Drugs Act of 2002.