TANOD NA UMAWAT SA DISKUSYON, SINAKSAK NG KAPWA TANOD

Sugatan ang isang barangay tanod matapos saksakin ng kapwa tanod bandang alas 10:35 kagabi sa Dumga, Makato.

Nakilala ang biktimang si Nestor Tajaran, 55 anyos, at ang suspek na si Johny Timtiman 42 anyos, kapwa barangay tanod at mga residente rin ng nasabing lugar.

Base sa imbestigasyon ng Makato PNP, nangyari ang insidente sa pamamahay ni Avelino Tugna alyas ‘Jaworski’ kung saan naka diskusyon umano nito si Jerry Custodio sa hindi natukoy na dahilan.

Doon umano umawat ang biktima para hindi tuluyang mag-away ang dalawa, subalit dumating naman ang suspek, bumunot umano ng kutsilyo at sinaksak ang biktima.

Kaagad dinala sa ospital ang nasugatan sa kaliwang balikat na tanod, habang naaresto naman kinalaunan ang suspek na sinasabing kaagad lumapit sa mga pulis at ilang barangay officials na sumama sa ikinasang man hunt operation.

Pansamantala siyang ikinustodiya sa Makato PNP station para sa karampatang disposisyon, hahang hindi na narekober ang ginamit nitong kutsilyo matapos umano niya itong ihagis kagabi.