MGA MAGRE-RENEW NG LISENSYA, HINDI NA KAILANGANG SUMAILALIM SA 15-HOUR THEORETICAL COURSE — LTO

Hindi kasama sa mga sasailalim sa 15-hours theoretical course ng Land Transportation Office (LTO) ang mga magpapa-renew ng kanilang lisensya at magpa convert ng foreign driver’s license sa Philippine driver’s license.

Ito ang nilinaw ni LTO 6 Spokesperson Riza Otayde. Ayon sa kanya ang sakop ng nasabing guidelines base sa advisory na ipinalabas ng LTO ay ang mag-a-apply ng student permit pagkatapos ng Agosto 3, ngayong taon.

Base sa LTO Memo Circular 2019-2176, kailangan ng aplikante na makakuha ng certificate if completion bilang katibayan na natapos niya ang 15 hours theoretical course bago makakuha ng student permit.

Sa ngayon sa LTO regional office pa lang pwedeng makapa-enroll para sa nasabing theoretical course dahil hindi pa na finalize ang mga accredited driving schools na magsasagawa nito.