PANGALAN NI US PRES TRUMP, NAKAUKIT SA KATAWAN NG ISANG MANATEE

Ilang araw matapos ang mga kontrobersyang kinasangkutan ni outgoing US President Donald Trump, natawag ang atensyon ng mga kinauukulan dahil sa nakaukit na pangalan ni Trump sa likod ng isang manatee.

Ang nasabing manatee ay nadiskubre sa Blue Hole on Homosassa River, batay sa nailathalang ulat ng Citrus County Chronicle.

Kasalukuyang iniimbestigahan ng US Fish and Wildlife Service ang insidente dahil sa pang-aabuso sa sea creature.

Malinaw na mababasa ang salitang TRUMP na mangyayari lamang dahil sa malalim na pagkakaukit nito sa katawan ng manatee.

Posible rin umanong may mensaheng nais ipaabot ang kung sino mang may gawa nito.

Ang nangyari sa manatee ay isang Class A federal criminal offense at ang sinumang mahuling gumagawa nito ay maaaring makulong ng hanggang isang taon at pagmultahin ng $50,000.

Patuloy na umaapela ang mga kinauukulan sa kung sino man ang makapagbibigay ng imporasyon hinggil sa sinapit ng manatee.