Misis nahuli ni mister na may kasamang ibang lalaki papalabas sa isang motel sa Capiz

Nahuli ng isang mister ang kaniyang misis na lumabas ng isang motel kasama ang isang lalaki sa Brgy. Punta Tabuc, Roxas City araw ng Linggo matapos magpaalam na mamili lamang ng mga paninda sa kanilang sari-sari store.

Matapos umalis ng bahay, namataan ng 23-anyos na anak nitong lalaki ang 45-anyos na misis sakay sa isang tricycle at papunta ng isang motel.

Nagsumbong ang 23-anyos na anak sa kaniyang ama kaya pinuntahan nila ang motel at doon naabutan nila ang misis papalabas ng motel sakay ng isang tricycle.

Hinabol ng 23-anyos na lalaki ang tricycle at naabutan nito ang driver na isang 38-anyos na OFW. Sasaksakin sana nito ang driver pero nakatakas ito at iniwan ang tricycle pati ang misis.

Sa galit ng 47-anyos na mister, itinaob nito ang nasabing tricycle sa kalsada.

Kalaunan ay nagkita-kita ang magkabilang panig sa Roxas PNP Station. Sinabi ng lalaking suspek na walang nangyari sa kanila ng babae dahil ayaw nitong pumasok sa motel.

Nangako ang huli na hindi na ito magpapakita sa misis at sa kanilang pamilya. Pinatawad ito ng 47-anyos na mister.

Nabatid na parehong taga-Brgy. Culasi ang sangkot sa insidente.