DAHIL SA SUGAL, 2 SUGATAN SA ISANG KOMOSYON SA LAMAY

Dahil sa sugal, dalawa ang sugatan habang 2 rin ang arestado sa isang lamay pasado alas 12:00 kaninang hating-gabi sa Bulwang-Looban, Numancia.

Nakilala ang mga biktimang sina Jocel Gomez, 26 anyos ng Bulwang, Numancia, at Anthony Pamposa, 26 anyos ng Purok 2, C.Laserna, Poblacion, Kalibo, at ang mga naarestong sangkot sa komosyon na sina Ernesto Verra, 25 anyos at Michael Bantigue, 44 anyos, kapwa residente ng Bulwang, Numancia.

Base sa inisyal na imbestigasyon ng pulis, nakikipagpustaan umano sa larong Lucky 9 doon si Ernesto nang makasagutan nito si Dongdong Sabal ng Purok 2, C.Laserna.

Kasunod nito, sinasabing sinuntok ni Verra si Sabal, rason na nagpasaklolo umano ito sa mga kaibigang nag-iinuman doon sa di kalayuan.

Isang rambol at pangbabato sa mismong lamay ang sumunod na ikinasugat ng dalawang biktima.

Kaagad silang dinala sa ospital kung saan nagtamo ng sugat sa dibdib si Gomez habang sa tiyan naman ang sugat ni Pamplosa.

Samantala, kasalukuyang nasa kostodiya ng Numancia PNP Station sina Verra at Bantigue para sa karampatang disposisyon, subali’t tumanggi ang mga itong magbigay ng pahayag.

Kinumpirna naman ng pamilyang may lamay na si Annie Pamposa ang insidente, subali’t blangko maging sila sa kung sino ang sumaksak sa mga biktima lalo sa kanyang kapatid na si Anthony.

Patuloy pa ang imbestigasyon ng pulis sa insidente.