Ambulansiya at bus nagbanggaan sa Tapaz, Capiz; isa kritikal, 3 sugatan

Isa ang kritikal habang tatlo ang sugatan matapos magbanggaan ang isang bus at ambulansiya sa Brgy. Malitbog, Tapaz, Capiz dakong alas-6:00 ng gabi nitong Linggo.

Kinilala ang kritikal na si Joemarie Gasis, driver ng ambulansiya, residente ng Brgy. Salong ng nasabing bayan.

Sugatan naman ang dalawang pasahero ng bus pati na ang driver nito na kinilalang si Joemary Gello-ano, 35, residente ng Brgy. Lonoy, Calinog, Iloilo.

Batay sa imbestigasyon ng Tapaz PNP, magreresponde sana ang ambulansiya nang bumangga ito sa likurang bahagi ng bus.

Mabilis na dinala sa Iloilo City ang driver ng ambulansiya para sa kaukulang paggamot.

Nasa kostudiya ngayon ng Tapaz PNP ang driver ng bus para sa kaukulang disposisyon habang iniimbestigahan pa ang insidente.