30-ANYOS NA LALAKI SINAKSAK SA CUARTERO, CAPIZ

Sugatan ang isang 30-anyos na lalaki matapos siyang saksakin habang nakahiga sa kaniyang kwarto sa Sitio Nato, Brgy. Malagab-i, Cuartero, Capiz.

Kinilala sa report ng Cuartero PNP ang biktima na si Sanvi Batoleño, 30-anyos, residente ng nasabing lugar.

Kinilala naman ang suspek na si Isidro Batoleño, 42, isang magsasaka, residente rin ng naturang barangay.

Batay sa inisyal na imbestigasyon, nakahiga sa kaniyang kuwarto ang biktima nang bigla nalang umanong pumasok ang suspek at sinaksak ang una. Tinamaan ang biktima sa kaniyang kaliwang kamay.

Nagawa ng biktima na harangin ang suspek at nakatakbo papalabas ng kanilang bahay at humingi ng tulong sa mga tao.

Tumakas rin ang suspek matapos maaktuhan ng kapatid ng biktima.

Agad na dinala sa ospital ang biktima habang pinaghahanap naman ng kapulisan ang suspek.