LASING NA NAGWALA, ARESTADO MATAPOS MAHULIHAN NG BARIL

Numancia – Kalaboso ang inabot ng isang lasing matapos umanong mahulihan ng baril bandang alas 5:00 nitong umaga sa Laguinbanwa, West, Numancia.

Nakilala ang suspek na si Julius Bolido, 46 anyos ng nasabing lugar.

Base sa report ng Numancia PNP, mismong ang ama ng suspek ang tumawag ng pulis nang magisnan umano nito ang anak na nag-iingay at pinagtataga ang kanyang mga pananim doon.

Kaagad namang rumesponde ang mga pulis subalit nakita umano ng mga ito ang isang baril sa kanyang beywang.

Dahil dito, kaagad siyang inaresto at kinumpiska ang kanyang baril na kalibre .38 na may 5 bala.

Pansamantala siyang ikinustodiya sa Numancia PNP habang inihahanda ang kasong paglabag sa RA 10591 o Comprehensive Law on Firearms and Ammunitions na isasampa laban sa kanya.