3 NAAKTUHANG NAGTO-TONG ITS, 2 ARESTADO, 1 NAKATAKAS

New Washington – Dalawa sa tatlong lalaki na naaktuhang nagto-tong its kahapon ng hapon sa Tambak, New Washington ang nakatakdang kasuhan dahil sa paglabag sa PD 1602 o Anti-Illegal Gambling Law.

Nakilala ang mga naarestong sina Brian Tolentino, 40 anyos, at Larly Dela Luna, 45 anyos, habang nakatakas umano ang isa pa nilang kasama na si Rufino Carillo, sa legal na edad, lahat residente ng nasabing lugar.

Ayon sa New Washington PNP, nagroronda umano sila kahapon nang parahin sila ng isang concerned citizen at nagsumbong na may naglalaro ng tong its sa labas ng isang bahay.

Kaagad umanong pinuntahan ng mga nagpapatrolyang pulis ang lugar, kung saan naaktuhan ang mga suspek, subalit kaagad tumakas si Carillo.

Kaagad namang inaresto ang 2, at kinumpiska ang 1 set ng baraha, P432.00 na pera, 2 upuan at 1 mesa, na nasa kustodiya naman ngayon ng New Washington PNP Station para sa karampatang disposisyon, matapos iimbentaryo sa presensya ng 1 opisyal ng barangay.

Samantala, sinabi pa ng New Wahington PNP na uunahin muna nilang iinquest ngayong araw ang 2 naaresto, habang sasampahan din ng nasabing kaso ang nakatakas na suspek sa pamamagitan ng regular filing.