DAHIL HINDI UMANO PINAHIRAM NG MOTORSIKLO, LALAKI, NANAKSAK

Sasampahan ngayong araw ng kasong Frustrated Homicide ang isang lalaking nanaksak matapos umanong hindi pahiramin ng motorsiklo nitong Sabado at Pasko ng gabi sa Camanci Norte, Numancia.

Kinilala ng Numancia PNP ang suspek na si Jasper Teodosio, 19 anyos ng Baybay, Makato, habang nakilala naman ang biktimang si John Eman Majabague, 23 anyos ng Camanci Norte, Numancia, kapwa mga construction worker.

Base sa imbestigasyon ng pulis, hihiram umano sana ng motorsiklo ang suspek sa biktima, subali’t tinanggihan ito ng huli, na nauwi naman sa diskusyon.

Kasunod nito, sinaksak ng suspek sa leeg at kamay ang biktima na kaagad namang dinala sa ospital, habang kaagad tumakas ang suspek matapos ang insidente.

Samantala, nabatid na naaresto dakong alas 9:0O kahapon ng umaga ang suspek sa tulong ng mga barangay tanod at residente sa lugar, matapos umano nitong magtago sa taniman ng saging at nipa.

Pansamantala siyang ikonustodiya ng Numancia PNP para sa karampatang disposisyon, subali’t hindi na narekober pa ang ginamit umano nitong patalim.