TRAYSIKEL, BUMALIKTAD MATAPOS BUMANGGA SA BARANDILYA; 2 SUGATAN

Sugatan ang dalawang katao matapos bumaliktad ang sinasakyan nilang traysikel kaninang umaga sa highway ng Sitio Bangbang, Feliciano, Balete.

Nakilala ang mga biktimang sina Romeo Pasmala, na siyang driver ng traysikel at pasahero nitong si Romulo Domiguez, kapwa sa legal na edad at residente ng Sitio Agdawan ng nabanggit na lugar.

Base sa imbestigasyon ng Balete PNP, pauwi na umano ang dalawa nang nawalan umano ng kontrol sa manibela ang driver pagdating sa pababa at kurbadang kalsada.

Dahil dito, bumangga sa barandilya ang traysikel bago bumaliktad.

Kapwa nagtamo ng sugat sa katawan ang mga biktima, na kaagad namang isinugod sa ospital ng mga taga Balete Rescuers.

Nagbigay naman ng payo ang Balete PNP sa mga motorista na mag-ingat sa pagmamaneho sa lugar lalo pa’t madalas ang aksidente doon.