RIDER NG MOTOR, PATAY SA AKSIDENTE

Dead-on-arrival sa Aklan Provincial Hospital ang isang rider ng motor na naaksidente sa Brgy. Ibao, Lezo kahapon.

Kinilala ni PSMSgt Roel Relator ang biktimang si Myrel Macavinta Legaspi, 38 anyos ng Barangay Aliputos, Numancia.

Batay sa imbestigasyon, sakay ng kanyang motorsiklo ang biktima dakong alas-3:50 kahapon nang mangyari ang aksidente sa boundary ng Ibao, Lezo at Numancia.

Ayon sa mga saksi, nagpa ekis-ekis umano ang takbo ng motor at nawalan ng control si Legaspi saka dumiretso sa punong kahoy.

Sa lakas ng pagkakasalpok, nagtamo ang biktima ng malubhang pinsala sa ulo.

Mabilis na nagresponde ang MDRRMO Numancia pero hindi na ito umabot ng buhay sa ospital.

Pinaniniwalaan ng Lezo PNP na nakainom ang biktima nang mangyari ang insidente.