19-ANYOS NA LALAKI PATAY MATAPOS MAHULOG SA TRICYCLE SA ROXAS CITY

Patay ang isang 19-anyos na lalaki habang ginagamot sa ospital matapos umano itong mahulog sa sinasakyang niyang tricycle sa Brgy. Dinginan, Roxas City.

Kinilala ang biktima na si John Lloyd Madrid Baliquidang, residente ng Brgy. Punta Tabuc, dito sa syudad.

Ayon sa salaysay ng ina ng biktima sa Roxas City PNP, nahulog ang anak nito sa tricyle noong Disyembre 30, 2021, matapos dumaan ang sinasakyan niyang tricycle sa malubak na bahagi ng kalsada.

Ang tricycle ay menamaneho ng pinsan ng biktima na si Jelo Clyde Cantor. Mula sila sa Brgy. Talon at papunta sanang Brgy. Punta Tabuc nang maganap ang insidente.

Dahil rito, nagtamo ng malubhang sugat sa ulo ang biktima at agad na dinala sa Roxas Memorial Provincial Hospital para gamotin.

Inilipat ang biktima sa isang pribadong ospital matapos ang isang linggo pero nito lang Enero 15, Sabado, ay binawian ng buhay ang biktima habang ginagamot roon.

Minabuti ng ina na iparekord sa kapulisan ang insidente.