Aklan News
KAPITAN RENE MELAÑO NG CABATANGA, MAKATO, NAAKSIDENTE SA MOTORSIKLO
Sugatan at naka confine ngayon sa isang pribadong ospital si Cabatanga, Makato Barangay Captain Rene Melaño, matapos umanong maaksidente sa kanyang motorsiklo habang papauwi bandang alas 9:00 kagabi.
Ayon sa kanyang misis na si Ailene, naka ICU umano sa St. Gabriel Hospital si kapitan at kasalukuyang ginagamot doon matapos magtamo ng sugat at pinsala sa katawan.
Bagama’t isang self accident at hindi na naireport sa Makato PNP Station ang insidente, kinumpirma din ng kanyang may bahay na posibleng sumalpok sa isang poste si kapitan sa hindi pa nalamang dahilan.
Ayon pa sa kanyang misis, nagpaalam pa umano sa kanya kahapon ang kanyang mister na pupunta sa palayan sa Dumga, Makato, at nakausap pa niya ito sa cellphone bago nangyari ang insidente.
