RIDER NG MOTORSIKLO, PATAY MATAPOS BUMANGGA SA BUS, ANGKAS, SUGATAN DIN

Dead on arrival sa Ibajay District Hospital ang isang rider ng motorsiklo habang sugatan din ang kanyang angkas matapos bumangga sa isang bus bandang alas 3:20 kahapon ng hapon sa highway ng Naisud, Ibajay.

Bagama’t hindi na pinangalanan ng Ibajay PNP ang mga biktima, nabatid na 50 anyos ang driver ng motorsiklo, at 20 anyos naman ang angkas nito, kapwa residente ng Mambog, Banga.

Sa paunang imbestigasyon ng pulis, nabatid na papunta sa direksyon ng Kalibo ang dalawa, subali’t posible umanong nawalan ng kontrol sa manibela ang driver pagdating sa kurbadang kalsada.

Resulta, aksidente silang bumangga sa kaliwang bumper ng bus, at sumemplang sa kalsada.

Sa lakas ng pagkakabangga, nagtamo ng malughang sugat sa ulo ang driver, lalo pa’t nabasag umano ang mga suot nilang helmet.

Kasalukuyan namang nasa isang pagamutan sa Kalibo ang angkas nito, habang nasa kostodiya ng Ibajay PNP ang driver ng bus para sa karampatang disposisyon.