Lalaki sinaksak ng lasing, suspek arestado

Sugatan ang isang lalaki matapos saksakin ng lasing sa labas ng kanilang bahay pasado ala 1:00 kaninang madaling araw sa Navitas, Malinao.

Nakilala ang biktimang si Marcial David, 41 anyos, habang nakilala naman ang naarestong suspek na si Chris John Ingles, 31 anyos, kapwa residente ng nasabing lugar.

Base sa imbestigasyon ng Malinao PNP, natutulog noon sa higaang kawayan sa labas ng kanilang bahay ang biktima, dahil mainit sanhi ng pagbrown out.

Subali’t nagising na lamang umano ito nang may mambato sa kanilang bahay, rason na kanyang kinumpronta.

Subali’t bigla umanong bumunot ng patalim ang suspek at sinaksak sa kaliwang paa ang biktima, na kaagad namang nakakuha ng kawayang panghampas, para idipensa ang sarili, na patuloy parin umanong umaatake sa kanya.

Kaagad namang nakatakas ang suspek, subali’t naaresto naman kinalaunan sa isinagawang hot pursuit operation.

Sa panayam naman ng Radyo Todo kay PLt. Gelbert Batiles, OIC ng Malinao PNP base narin umano sa imbestigasyon nila sa suspek na binato umano nito ang bahay ng biktima dahil sa pagkahol ng kanilang aso nang mapadaan siya doon.

Lumalabas pa sa imbestigasyon na nasa impluwensiya ng alak ang suspek nang mangyari ang insidente.

Samantala, inihahanda na ngayon ng Malinao PNP ang kasong Frustrated Homicide na isasampa sa suspek, na tumanggi namang magbigay ng pahayag nang kapanayamin ng Radyo Todo.