Rider ng motorsiklo sugatan matapos sumalpok sa traysikel

Nakahanda umanong makipag-areglo ang driver ng traysikel na nakabanggaan ng isang motorsiklo alas 5:40 kahapon ng hapon sa Barangay Road ng Mangan, Banga.

Sa report ng Banga PNP, nagtamo ng sugat sa ulo at kaliwang mata ang biktimang rider ng motorsiklo na si Richard Tupaz, 45 anyos, habang sugatan din ang biktimang si Roseni Relimbo,61 anyos na asawa at pasahero mismo ng traysikel drayber na si Hervinaldo Relimbo, 68 anyos, lahat residente ng nasabing lugar.

Base sa imbestigasyon ng Banga PNP, mula sa direksyon ng Poblacion, Banga ang traysikel papasok sa Pagsanghan, subali’t aksidenteng nakabanggaan pagdating sa kurbada ng nasabing motorsiklo na palabas naman ng Pagsanghan.

Base pa sa imbestigasyon, mabilis ang takbo ng motorsiklo, subali’t nasa maling linya dahilan na nakabanggaan ang traysikel.

Kaagad namang dinala sa pagamutan ang mga biktima, habang kapwa nagtamo ng pinsala ang traysikel at motorsiklo sanhi ng aksidente.