2 motornapping suspek naaresto ng mga kapulisan

Nakapiit ngayon sa kulungan ang dalawang lalaking suspek sa motornapping sa Bulwang, Numancia nitong Sabado, Pebrero 4.

Tinangay ng mga suspek na sina Christian Jagurin, 20 anyos, ng Brgy. Ugsod at 17 anyos nitong kasamahan na taga Cerudo, Banga ang RS Yamaha 100CC na asul na pagmamay-ari ni Nelson Laurente ng Bulwang, Numancia.

Ayon kay Christian, hinimok siya ng menor de edad na kasama na pumunta sa Brgy. Old Buswang, Kalibo para makipag-inuman sa mga kaibigan at sinabing may target umano silang nakawan.

Matapos makipag-inuman, dumiretso ang dalawa sa Brgy. Bulwang kung saan nadaanan nila ang motorsiklo ni Laurente na nasa labas ng kanilang bahay at sinakyan pauwi.

Agad namang naaresto ang dalawa sa bayan ng Banga sa pagtutulungan ng pinagsanib na pwersa ng Numancia Police at HPG.

Ayon kay PMS Edmund Apelado ng HPG, inihahanda na nila ang kasong motornapping sa dalawang suspek habang hinihintay ang certificate of discernment mula sa MSWD.