Senior Citizen tumilapon mula sa minamanehong traysikel matapos mabangga ng closed van

Tumilapon ang isang senior citizen mula sa kanyang minamanehong traysikel matapos na masalpok ng isang closed van nitong Huwebes sa may crossing Tabangka, Numancia.

Kinilala ni PSSgt. Marlon Del Rosario – officer on case, ang 62 anyos na driver ng traysikel na si Rexinor Tambong, residente ng Brgy. Laguinbanwa East, Numancia.

Lumalabas sa imbestigasyon na papasok na sana ang traysikel sa crossing mula sa highway nang mabangga ito sa likod ng kasunod na closed van na minamaneho ni Jusiffet Arroyo, 33 anyos, residente ng Aranas, Balete.

Sa lakas ng impact, tumagilid ang traysikel at tumilapon naman si Tambong dahilan nang tinamo nitong pinsala sa ulo at iba pang parte ng katawan.

Inihahanda na ng mga awtoridad ang mga dokumento sakaling magpasya ang biktima na magsampa ng kaso laban sa driver ng closed van na pansamantalang ikinustodiya sa Numancia PNP.