Lalaki, patay matapos maglaro ng basketball sa liga

Binawian ng buhay ang isang lalaki matapos maglaro ng basketball kagabi sa Brgy. Tinigaw, Kalibo.

Salaysay ni Brgy. Captain Ma. Lourdes Reyes ng Tinigaw, nagtatrabaho sa MKWD ang 40 anyos na biktima at kakauwi lang nito galing sa trabaho nang humabol sa laro.

Nasa 4^th quarter na umano ng laro nang dumating at sumali ang biktima.

Pero pagkatapos umano nitong mag rebound ay unti-unti itong yumuko at tumumba.

Agad umanong tumawag sa MDRRMO ang kanilang SK Chairman at ni-revive ang biktima habang dinadala sa ospital pero binawian din ito ng buhay.

Batay umano sa doktor, naubusan ng oxygen sa utak ang biktima dahilan ng kanyang pagkamatay.

Nagpaabot ng pakikiramay si Kapitan sa pamilya ng biktima kasunod ng nangyari.

Gayunpaman, ipagpapatuloy pa rin umano nila ang liga sa barangay.