Pulis na nakamotor, aksidenteng nabangga ng traysikel

Aksidenteng nabangga ng isang traysikel ang motorsiklong minamaneho ng isang pulis kagabi sa Brgy., Poblacion, Kalibo.

Kinilala ang driver ng motor na si Pat. Jovy De Guzman, 28-anyos, pulis na nakatalaga sa Capiz PPO. Angkas nito ang kanyang 19-anyos na kapatid na si Nica Gonzales parehong mga taga Brgy. Tambak, New Washington.

Batay sa report, binabaybay ni Guzman ang kahabaan ng Rizal St. patungong XIX Martyrs St. nang bigla itong sinalpok ng traysikel na minamaneho naman ni Lolito Gallardo Jr., 47-anyos na residente ng Brgy. Jumarap, Banga.

Dahil dito, sumemplang sa sementadong kalsada ang mga biktima at nagtamo ng pinsala sa katawan.

Isinugod naman kaagad ang mga ito sa isang pribadong ospital sa bayan ng Kalibo.