Tatlong motorsiklo sa Diversion Road Tigayon nagkarambola, isang driver nagtangkang tumakas

Nagsalpukan ang tatlong motorsiklo sa may Diversion Road, Brgy. Tigayon, Kalibo dakong alas-6:40 kaninang umaga, Oktubre 13, 2023.

Base sa imbestigasyon, palabas umano ang driver ng Rusi na si Isagani Tacud, 65-anyos ng Brgy. Aglucay, Makato sa interior ng Bukid Tigayon, Kalibo nang sumalpok ito sa Honda TMX na galing sa direksyon ng Lezo na minamaneho ni Joemar Masgong, 42-anyos angkas ang 16-anyos nitong anak.

Samantala, akma sanang mag-oovertake sa Honda TMX ang isa pang motor na Skygo na minamaneho ni Renante Flores ng Brgy. Bagto Lezo nang mangyari ang salpukan kaya nadawit ito at tumilapon.

Ayon sa mga nakakita ng nangyari, nagtangka pang tumakas si Tacud ng mangyari ang aksidente pero itinanggi niya ito.

Nagtamo ng mga galos sa katawan ang mga sangkot sa aksidente na agad binigyan ng first aid ng MDRRMO Kalibo.

Sa ngayon, nasa kustodiya pa ng mga kapulisan ang dalawang driver ng motorsilko para sa kaukulang disposisyon.