Negosyante ng baka na nagtutulak umano ng droga, arestado sa buy bust operation; suspek mahaharap sa patong-patong na kaso

Patong-patong na kaso ang kahaharapin ng isang negosyante ng baka na nagtutulak ng shabu matapos itong maaresto sa drug buy-bust operation na pinangunahan ng Kalibo PNP at PDEU kahapon sa Brgy. Mobo sa bayan ng Kalibo.

Nakilala ang suspek na si Jerry Sim, 57-anyos residente ng nabanggit na lugar.

Napag-alaman na dati rin itong nakulong taong 2018 sa kaparehong kaso ng illegal drugs.

Batay sa Kalibo PNP, nagtangka pa umano itong tumakas nang matunugan na mga pulis ang kaniyang katransaksyon ngunit matagumpay parin itong nadakip.

Nakuha sa posisyon ng nasabing suspek ang limang sachet ng mga hinihinalang shabu kapalit ang P5,000 na buybust money.

Sa pagpapatuloy ng pagsisiyat, nakuha rin sa kwarto ni Sim ang isang kartong aluminum foil, dalawang 45 kalibreng baril, isang 38 revolver at isang granada.

Samantala, sa isinagawang body-search sa suspek, nakuha naman ang pitaka nitong may laman na mahigit P15,000.

Mahaharap si Sim sa kasong paglabag sa RA 9165 o Comprehensive Dangerous Drugs Act of 2002 at Illegal Possession of Firearms.

Sa ngayon ay nasa kostudiya parin ito ng Kalibo PNP habang hinihintay ang resulta ng kaniyang drug test pati na rin ng examination sa nakuhang shabu para mai-file na ang mga nasabing kaso.