Palikong kotse nasalpok ng rumaragasang motorsiklo, likurang bahagi nito wasak

Wasak ang likurang bumper ng isang kotse matapos na aksidenteng masalpok ng rumagasang motorsiklo sa may Estancia, Kalibo ngayong umaga.

Kinilala ang drayber ng kotse na si Reynaldo Gatuz at ang drayber naman ng motorsiklo na si Archie Tamsi residente ng Lapnag, Banga angkas ang estudyante nitong anak.

Batay sa imbestigasyon ng Kalibo PNP, mula sa direksyon ng Poblacion, Kalibo si Gatuz, drayber ng kotse at papunta sanang Iloilo ngunit lumiko muna umano ito sa isang gasolinahan para mag pa gas. Pero habang paliko ay bigla itong nasalpok ng rumaragasang motorsiklo na galing naman sa direksyon ng Banga pa-Kalibo.

Aminado naman si Tamsi na mabilis ang kaniyang pagpapatakbo ngunit pinilit naman umano niyang iwasan ang kotse ngunit naabot parin ito.

Dahil dito, nawasak ang likurang bumper ng nasabing kotse habang nabali naman ang susi ng motorisklo.

Nagtamo rin ng sugat sa tuhod ang si Tamsi at sugat sa siko naman ang tinamo ng angkas nito.

Sa ngayon ay naka-record na ito sa Kalibo Municipal Police Station para sa karampatang disposisyon.