Aklan News
Nakaparadang kotse sa gilid ng kalsada nabangga ng rumaragasang sasakyan, tumilapon-wasak
Nawasak ang likurang bahagi ng isang kotse matapos itong tumilapon ng mabangga ng rumaragasang sasakyan habang nakaparada sa gilid ng kalsada ng Brgy. Caano, Kalibo dakong ala-1:40 ng madaling-araw ngayong Lunes.
Base sa Facebook post ni Ariane Rose Mandal Iguban, may-ari ng nasabing kotse, tulog na umano sila ng mangyari ang aksidente at nagulat nalang sila nang makita ang nangyari sa kanilang sasakyan.
Tumilapon sa kabilang linya ng kalsada ang nasabing kotse at nagtamo ng matinding yupi sa likurang bahagi.
Bukod rito, may isa pang tricycle na unang nabundol ang nasabing sasakyan bago dumiretso sa kotse ni Iguban.
Samantala, pagkalipas ng ilang oras ay pumunta naman umano ang tatay ng driver na nakabangga para makipag-usap sa mga nabiktima at handa naman umano itong magbayad sa mga pinsala.
Napag-alaman na matinding sira din ang natamo ng sasakyang nakabangga.
