Hairstylist sa Boracay, tiklo sa drug buy bust operation ng Malay PNP

Walang nagawa kundi umiyak ang isang hairstylist matapos mahuli sa drug buy bust operation kaninang madaling araw sa Zone 7, Sitio Manggayad, Brgy. Balabag sa isla ng Boracay.

Kinilala ang suspek na si Acquilles Almontero, 53-anyos na tubong Iloilo City at pansamantalang nakatira sa Sitio Bolabog, Brgy. Balabag, Malay, Aklan.

Nabilhan ang suspek ng isang sachet ng shabu kapalit ng P1,100 na buy-bust money.

Nakuhaan pa ang suspek ng dagdag na walong sachet ng shabu sa body search.

Ayon sa Malay PNP, bago lang sa pagbebenta ng iligal na droga si Almontero at ilang beses na nila itong na test buy.

Tinataya namang nasa P20,400 ang halaga ng mga narekober na shabu sa suspek at sinasabing sa isla ng Boracay lang din ito kumukuha ng mga drogang ibinebenta.

Tumanggi na rin itong magbigay ng pahayag sa Radyo Todo at naging emosyonal nang arestuhin ng mga otoridad.

Sa ngayon ay pansamantalang nakakustodiya si Almontero sa Malay PNP at nakatakdang sampahan ng kasong paglabag sa RA 9165 o Comprehensive Dangerous Drugs Act of 2002.