Babaeng nag-aayos ng foodcart, nasagi ng tricycle; driver tumakas

Sugat sa paa ang tinamo ng isang babae matapos na masagi ng rumagasang tricycle sa bahagi Purok 3 C. Laserna Street, Poblacion, Kalibo kagabi.

Napag-alaman na 24-anyos ang babaeng biktima na residente rin ng nasabing lugar.

Batay sa imbestigasyon ng Kalibo PNP, nag-aayos umano ng food cart sa gilid ng kalsada ang biktima ng aksidente itong masagi ng tricycle.

Sinasabing may kabilisan ang pagpapatakbo nito nang masagi ang babae.

Natumba ito at nasugatan sa paa na agad ding nirespondehan ng MDRRMO Kalibo para dalhin sa ospital.

Sa ngayon ay patuloy pa ang imbestigasyon ng Kalibo Pnp para matukoy ang driver ng tricycle.