Toyota Wigo wasak matapos sumalpok sa nakaparadang wing van, driver sugatan

Confined sa ospital ang isang lalaking driver ng Toyota Wigo matapos itong sumalpok sa nakaparadang wing van dakong ala-1:00 kaninang madaling araw sa bahagi ng Roxas Ave. Ext, Brgy. Andagao, Kalibo.

Napag-alaman na 27-anyos na residente ng Brgy. Linabuan Norte, Kalibo ang naturang driver.

Batay sa report, binabaybay nito ang kalsada mula sa direksyon ng Poblacion patungong Andagao.

Ngunit nang makarating sa lugar ay bigla umanong pumagilid ito dahilan nang kaniyang pagkasalpok sa nakaparadang wing van.

Sa lakas ng pagkabangga, wasak ang naturang wigo na halos hindi na mapakinabangan habang sugat sa ulo at mga galos pa sa katawan ang tinamo ng driver.

Agad din itong isinugod sa isang pribadong ospital na ngayon ay patuloy pang ginagamot.