Laptop, umano’y ninakaw sa Balete

Tinangay ng hindi pa nakikilalang kawatan ang isang laptop na nakalagay malapit sa bintana ng isang bahay sa Brgy. Aranas, Balete.

Pahayag ng isang miyembro ng Balete PNP, nakatanggap umano sila ng report dakong alas-2:50 kaninang madaling-araw na may nangyaring nakawan sa lugar.

Agad itong tinungo ng mga otoridad at pagdating nila ay nadiskubreng isang laptop ang natangay ng kawatan kasama ang ID nito at isang jacket.

Sa inisyal na imbestigasyon, nakita pa umano ng may-ari ang laptop nito na nakalagay malapit sa bintana bago umihi ngunit pagbalik ay wala na ito.

Pinaniniwalaang, pumasok sa kanilang gate ang kawatan saka kinuha ang naturang laptop na idinaan sa bintana.

May narekober namang kutsilyo sa labas sa ilalim mismo ng bintana na pinaniniwalaang naiwan ng kawatan.

Wala umanong CCTV sa mismong bahay kaya’t patuloy pa sa ngayon ang paghahanap ng mga CCTV footage ng mga otoridad sa mga daan o sa kalapit na bahay para matukoy ang salarin.