1 rider ng motor patay, 2 menor de edad sugatan sa aksidente sa Cawayan, New Washington

PATAY ang isang 57-anyos na lalaki habang sugatan naman ang dalawang menor de edad matapos magbangaan ang dalawang motorsiklo sa Brgy. Cawayan, New Washington kagabi, Setyembre 3, 2023.

Kinilala ni PSSg. John Lee Valencia ng New Washington PNP ang biktimang si Marianito Bañes, 57 anyos ng Brgy. Cawayan.

Lumalabas sa imbestigasyon na galing sa sabungan ang biktima at pauwi na alas-5:50 kagabi nang makabanggaan ang dalawang menor de edad na sakay rin ng motorsiklo.

Liliko na sana ang biktima pero hindi umano napansin ng 17-anyos na binatilyong driver ang kanyang signal light dahilan ng banggaan.

Dahil sa mga tinamong pinsala, hindi na nakaabot pa ng buhay sa ospital si Bañes.

Sugatan at confined naman ngayon sa ospital ang 16-anyos na dalagang angkas ng binatang rider.

Patuloy pa ang imbestigasyon ng mga otoridad kaugnay sa aksidente.