2 GINANG, TIKLO SA ILEGAL NA PAGTITINDA NG GASOLINA

Arestado sa ilegal na pagbibenta ng gasolina ang dalawang misis sa Dumga, Makato kaninang tanghali.

Hindi na pinangalanan ng Makato PNP ang mga naaresto kung saan nabatid na unang naaresto ang 53 anyos na misis nang mabilhan ng gasolina na nagkakahalaga ng P100.00 gamit ang buy bust money.

Kasunod nito, narekober mula sa pangangalaga ng ginang ang kabuuang 28 litro ng gasolina na nagkakahalaga ng P1,214.75.

Halos kasunod din namang na buy bust ng gasolina ang kaharap nitong bahay matapos mabilhan umano ng gasolina na nagkakahalaga rin ng P100.00 na buy bust money.

Nakumpiska rin ng mga pulis ang kabuuang 33 litro ng gasolina sa iba’t-ibang lalagyan na nagkakahalaga naman ng P1,312.00.

Kasong paglabag sa PD 1865 o Ilegal Trading of Petroleum Products halimbawa ng tingi-tinging gasolina ang kakaharapin ng dalawa.

Pansamantala silang ikinustodiya sa Makato PNP Station para sa karampatang disposisyon.

Samantala, mahigpit namang paalala ng Makato PNP na ipinagbabawal ng batas at mapanganib ang pagbibenta ng tingi-tinging gasolina.