2 lalaking nagkunwaring collector ng isang financing company, huli sa entrapment operation sa bayan ng Numancia

Nalambat ng mga kapulisan sa ikinasang entrapment operation ang dalawang lalaking nagpanggap na collector ng isang financing company nitong Miyerkules.

Kinilala ang mga inaresto na sina Salvador Gabriel Dalmacio at Vergil Dellano.

Ikinasa ang nasabing operasyon matapos na magduda si Punong Barangay Lalaine Tan ng Laguinbanua East, Numancia sa gagawing transaksiyon ng suspek.

Sa mismong barangay hall ng Laguinbanwa East nangyari ang operasyon kung saan kaagad hinuli ng mga miyembro ng Numancia PNP ang mga suspek matapos na matanggap ang P100K na pera na pambayad umano ng kliyento sa kanila.

Napag-alaman na dating nagtatrabaho sa nasabing financing company ang mga suspek.

Sa ngayon ay nasa kustodiya na ang mga ito ng Numancia PNP at nakatakdang sampahan ng kaukulang kaso.