2 motorsiklo na umano’y nagkarera, nagkarambola sa kahabaan ng Estancia, Kalibo

SUGATAN ang 4 na pasahero ng 2 motorsiklo matapos na magkarambola sa kahabaan ng Osmena Avenue, Estancia, Kalibo nitong Biyernes ng gabi.

Ayon sa ilang mga nakasaksi, pareho umanong tinatahak ng 2 motorsiklo ang daan mula Banga at patungo sana ng bayan ng Kalibo.

Dagdag pa rito, mabilis umano ang takbo ng mga motor at hinihinalang nagkakarera.

Nagkasagian umano ito at dito sila sumemplang at nagkarambola.

Dahil sa walang suot na helmet, nagtamo ng sugat sa ulo ang 4 na mga sakay ng 2 motor na agad namang nirespondehan ng mga rescuers at dinala sa ospital.

Sa ngayon ay nagpapatuloy pa ang imbestigasyon ng Kalibo PNP sa nangyaring aksidente.