25 anyos na lalaki sinaksak, suspek kulong sa Banga PNP

Sugatan ang isang 25 anyos na lalaki matapos na masaksak dakong alas-11:30 kagabi sa Brgy. Linabuan Sur, Banga.

Kinilala ang biktimang si John Kenneth Nahil, 25, na residente ng Mambog, Banga habang ang suspek naman ay si Michael Roldan, 52, na taga Linabuan Sur, Banga.

Batay sa Banga PNP, kapwa galing sa isang lamay ang biktima at suspek kung saan may nangyaring komosyon at sinasabing naitulak ng suspek ang nakatatandang kapatid na babae ng biktima.

Dahil dito kinumpronta ng biktima ang suspek habang papauwi at doon ito sinaksak.

Nagtamo ng tama ang biktima sa may kanang bahagi ng tiyan nito kaya ito dinala sa ospital at sa ngayon ay nasa maayos nang kondisyon.

Samantala, kulong naman ang suspek sa Banga PNP Station at hinihintay pa ang desisyon ng pamilya ng biktima kung magsasampa ang mga ito ng kaso laban sa kanya.