37 ANYOS NA LALAKI, ARESTADO SA ILLEGAL LOGGING

Balete-Arestado ang isang lalaki dakong alas 9:30 kaninang umaga sa Sitio Agbueakan, Feliciano, Balete dahil umano sa ilegal logging.

Nakilala ang naarestong si Retchie Antonio, 37 anyos ng Calizo, Balete.

Batay sa report ng Balete PNP, isinumbong ng isang concerned citizen ang pagchainsaw o pamumutol at paghahakot ng suspek ng kahoy sa lugar, dahilan upang kaagad itong pinuntahan ng mga pulis.

Kasunod nito, doon napag-alamang mga coco lumber o puno ng niyog ang pinagpuputol ng suspek ng chainsaw, kung saan wala ni-anumang hawak na dokumento.

Kaagad siyang inaresto at ikinustodiya sa piitan ng Balete PNP para sa karampatang disposisyon, kasama ang narekober na chainsaw at mga nalagareng coco lumber na nagkakahalaga ng P1,200.00.

Inihahanda naman ng Balete PNP ang kasong paglabag sa RA 9175 o Chainsaw Act 2002 na isasampa laban sa suspek.

Samantala, nang makapanayam ng Radyo TODO sinabi naman ng suspek na may papeles naman umano sila ng kanyang amo sa pagputol ng nasabing kahoy na gagamitin sana para sa bahay, subali’t hindi niya ito dala.

Aminado naman ang suspek na walang kaukulang papeles ang ginamit nitong chainsaw.