4 NA KABABAIHAN, KALABOSO DAHIL SA ILEGAL NA SUGAL

Nabas – Kalaboso ang inabot ng apat na kababaihan matapos umanong maaktuhan na nagsusugal sa harap ng isang resto bar sa Nagustan, Nabas.

Nakilala ang mga naarestong sina Dyna Jardenico, 36 anyos ng Nagustan, Nabas, Camille Nuñez, 22 anyos ng Naasog, Malay, at ang magkapatid na Jessa Lebuna, 26 anyos, at Jene Lebuna, 23 anyos, ng Cahigon, Calinog, Iloilo.

Base sa report ng Nabas PNP, nagkataong nagroronda umano sila noon nang itinawag sa kanila ang hinggil sa nangyayaring sugal doon.

Kaagad namang pinuntahan ng mga pulis ang lugar at doon umano naaktuhang naglalaro ng pusoy-bahig ang mga nasabing kababaihan.

Kaagad silang inaresto at kinumpiska ang kanilang baraha, mesa at mga upuan, kasama na ang kabuuang P1,340.00 na bet money o pusta.

Pansamantala silang ikinustodiya ng Nabas PNP habang inihahanda ang kaukulang kaso na isasampa laban sa kanila.