63 ANYOS NA LOLO, TINAGA NG LASING

Tangalan – Sugatan ang isang 63 anyos na lolo matapos tagain ng lasing alas 11:00 kagabi sa Afga, Tangalan.

Kinilala ng Tangalan PNP ang biktimang si Renson Templo na naka confine ngayon sa isang pribadong ospital, habang arestado naman ang suspek na si Zandro Dado, 37 anyos, kapwa residente ng nasabing lugar.

Base sa inisyal na imbestigasyon ng pulis, may dala umanong itak ang suspek nang sugurin nito ang biktima sa kanyang tindahan.

Nagsisisigaw umano ito nang pasukin niya ang biktima at tinaga sa kanang kamay, subalit kaagad naman itong nakahingi ng saklolo rason na umatras ang suspek at umuwi sa kanilang bahay.

Kaagad namang dinala sa ospital ang biktima, habang nadakip din kinalaunan ang suspek.

Mariin naman nitong itinanggi na tinaga niya ang biktima, at sinabing siya pa ang sinuntok nito sa paniniwalang nagalit ito sa kanya dahil sa madalas niyang pag-utang sa tindahan nito.

Nagpapatuloy pa ang imbestigasyon ng Tangalan PNP sa insidente.