Agawan sa pasahero ng 2 tricycle driver, nauwi sa pananaksak

Nauwi sa pananaksak ang agawan ng pasahero ng dalawang traysikel driver kahapon sa Toting Reyes St., Andagao, Kalibo.

Kinilala ang biktimang si Ryan Gonzales, 37-anyos residente Brgy. Mambog, Banga.

Batay sa ulat, inagaw umano ng suspek ang dalawang pasaherong nauna nang kinausap ng biktima sa may passenger van terminal.

Dahil dito, sinabihan siya ng biktima na nauna siya sa pasahero na sinagot naman ng suspek hanggang sa nagdiskusyon ang mga ito.

Umalis pa ang suspek para ihatid ang dalawang pasahero sa ceres terminal pero bumalik ito na may dala nang kutsilyo.

Nakita naman ito ng biktima kaya agad siyang umalis pero hinabol siya ng suspek at sinaksak pagdating sa may Allens Mart.

Mabilis na tumakas ang suspek matapos ang insidente habang ang biktima ay dinala naman sa ospital.

Nagpapatuloy pa ngayon ang hot pursuit operation para mahuli ang salarin.