Babaeng branch manager ng RD Pawnshop sa Kalibo, natagpuang duguan at patay

Wala ng buhay at duguan nang datnan ang 23 anyos na babaeng branch manager ng RD Pawnshop sa loob ng establisyemento sa Mabini St., Kalibo ngayong umaga ng Lunes, Hunyo 6.

Kinilala ni PLt. Aubrey Ayon ng Kalibo PNP ang biktimang si Bonna Hercia Ambay na taga Pandan, Antique at kasalukuyang nakatira sa isang boarding house sa New Buswang, Kalibo.

Sa paunang imbestigasyon, napag-alaman na sarado pa ang roll-up door ng pawnshop pero nakabukas na ang secondary gate nito nang dumating ang guard on-duty kaya naghinala ito at tumawag ng pulis.

Nang pasukin ng mga pulis ang establisyemento, tumambad sa kanila ang duguang katawan ni Ambay.

Sa ginawang pagsusuri, lumitaw na mayroong sugat ang biktima sa kamay at dibdib nito na possible raw na defense stab wounds.

Inaalam na din nila kung may mga nawawalang gamit o pera sa loob ng pawnshop.

Ayon pa sa pulis, mayroon na silang natukoy na person of interest na hindi na muna nila pinangalanan.

Patuloy pang iniimbestigahan ng mga taga Scene of the Crime Operatives (SOCO) ang krimen.