BABAENG MAY PROBLEMA UMANO SA PAG-IISIP, NATAGPUANG PATAY SA MAY ILOG

Ibajay – Patay na nang matagpuan sa ilog ng San Jose, Ibajay kaninang umaga ang isang babaeng may problema umano sa pag-iisip.

Ayon sa Ibajay PNP, nakadapa sa tubig ang hindi na pinangalanang babae, walang pang-ibabang damit at ‘bloated’ na umano ang kanyang tiyan nang matagpuan.

Base pa sa inisyal na imbestigasyon ng Ibajay PNP, wala namang nakitang anumang sugat sa katawan ang babae at narekober naman ang kanyang damit pang-ibaba pati na ang kanyang tsinelas.

Sinasabing bandang alas 4:00 kaninang madaling araw nang huling makita sa plaza ang babae lalo pa’t may lamay doon sa proper ng nasabing barangay.

Samantala, nakatakda namang isailalim sa autopsy examination ang bangkay ng babae, habang nagpapatuloy pa ang imbestigasyon ng mga pulis sa insidente.