BAGYONG TISOY WALA PANG NAPAULAT NA PINSALA – PDRRMC

Normal pa at wala pang napaulat na malaking insidenteng nangyari na may kinalaman sa paghagupit ng bagyong Tisoy na ngayon ay nasa Tropical Cyclone Signal no. 2 na sa Aklan.

Ito ay batay sa pahayag ni Executive Officer Galo Ibardolaza ng Provincial Disaster Risk Reduction and Management Office (PDRRMO) Aklan.

Ayon kay Ibardolaza, walang humpay ang kanilang pag monitor sa lagay ng panahon at antas ng tubig lalo na sa Aklan River.

Nilinaw nito na walang dapat na ikabahala ang publiko dahil masyadong mababa ang tubig sa Guadalupe Bridge at Mobo Bridge.

Dagdag pa nito, mararamdaman pa ang bagsik ng bagyo sa lalawigan hanggang bukas hanggang sa makarating na ang bagyo sa western part ng Zambales.

Paalala ni Ibardolaza sa publiko na laging maging handa sa mga oras ng sakuna.