Aklan News
Batang babaeng nakasilid sa sako, natagpuan sa Brgy. Cajilo, Makato
Isang batang babae na nakasilid sa sako ang natagpuan sa Brgy. Cajilo, Makato, kaninang hapon.
Mahilo-hilo pa ang bata ng makuha sa loob ng sako ng mga residenteng rumesponde sa lugar.
Ayon sa nakalap na inisyal na impormasyon ng Radyo Todo, narinig ng isang nagpapastol ng baka ang iyak ng bata sa lugar at ng kanyang siyasatin nakita nito ang isang sako na pinagdududahan niyang doon nanggagaling ang iyak. Dahilan upang ipaalam niya ito sa ilang residente para malaman ang laman ng sako, at doon tumambad sa kanila ang may 4-5 taong gulang na batang babae.
Ayon naman sa Makato MPS, nasa ospital ngayon ang bata para sa karampatang medikasyon.
May pagkakakilanlan na rin umano sila sa suspek na tumakas pagkatapos ng insidente na diumano’y pinsan rin ng biktima.
Patuloy pa ang isinasagawang imbestigasyon ng mga kapulisan sa motibo ng suspek.
Samantala, ipinag-utos na rin ni Makato Mayor Monmon Legaspi sa kapulisan ang agarang pagbibigay ng hustisya sa hindi makataong ginawa sa bata.
Ipinasiguro din nito na handa ang kanyang tanggapan na magbigay ng tulong sa pamilya ng biktima.
