Binata, sinaksak sa may bandang puwet ng isang menor de edad na dating kaalitan

Sinaksak sa may bandang puwet ng isang menor de edad ang isang lalaking dati umano nitong nakaalitan sa bayan ng Libacao.

Kinilala ang biktimang si Jeffrey Zaballero, 25 anyos ng Brgy. Julita, Libacao habang ang suspek naman ay isang menor de edad.

Batay sa isa sa mga saksi sa insidente, nakita nila ang mismong pagsaksak ng suspek sa biktimang nakasakay pa ng motor.

Napag-alaman na nagkasalubong ang dalawa habang papunta ang biktima sa isang lamay.

Minura umano ng suspek ang biktima kaya huminto ito sa pagpapatakbo ng motorsiklo.

Doon na agad na nilapitan ng suspek ang biktima at inundayan ng saksak.

Kumaripas ng takbo ang suspek matapos ang insidente pero agad din itong nahuli at ikinustodiya ng mga kapulisan.

Samantala, patuloy naman na ginagamot ang biktima sa Aklan Provincial Hospital.