BINATANG NAGNAKAW UMANO NG MOTORSIKLO, NAHULIHAN PA NG PATALIM, ARESTADO

Libacao – Arestado kagabi sa Julita, Libacao ang isang binatang nagnakaw umano ng motorsiklo nitong nakaraang araw ng Linggo sa Poblacion, Libacao. Ayon sa Libacao PNP, nahulihan pa ng patalim ang suspek na si Rejie Francisco, 18 anyos ng Sitio Pulilan, Pinonoy, Libacao.

Nakilala naman sa report ng pulis, ang ninakawan ng motorsiklo na si Paterno Ruiz, 54 anyos ng Poblacion, Libacao.

Napag-alamang nagreport kagabi sa Libacao PNP station ang misis ng may-ari ng motorsiklo na nakita umano nila ito sa plaza ng Barangay Julita.

Kaagad namang pinuntahan ng mga pulis ang lugar kung saan nadatnan nila ang suspek na nakikipag-inuman sa kanyang mga kaibigan, habang nakaparada sa tabi ng umbrella shed ang nasabing motorsiklo.

Positibo namang kinilala ng misis ang motorsiklo, dahilan na kaagad inaresto ang suspek na umamin naman na siya ang gumamit nito.

Samantala, nirikisa naman ang suspek kung saan nakuha sa kanya ang nasa 10 pulgadang patalim.

Kasalukuyang nasa kustodiya ng Libacao PNP ang suspek kasama ang narekober na patalim para sa karampatang disposisyon.

Nabatid pa sa report na bandang alas 3:00 ng madaling araw ng Linggo nang matuklasang nawawala ang nasabing motorsiklo.