CONSTRUCTION WORKER, BINARIL NG FOREMAN

Numancia – Sugatan ang isang construction worker matapos barilin ng mismong foreman bandang alas 9:00 kagabi sa Bulwang, Numancia.

Nakilala ang biktimang si Clinford Barraca, 38 anyos ng New Buswang, Kalibo, at ang suspek na foreman na si Joemarie De Ocampo, 34 anyos, tubong Pagao, Panitan, Capiz.

Sa panayam ng Radyo Todo sa suspek na si Joemarie, magkasama rin silang nag-inuman ng iba pang trabahador bandang alas 4:00 kahapon ng hapon, subalit humiwalay umano ito kinalaunan sa grupo.

Kinagabihan, dumating umano sa kanyang barracks ang suspek, at nagulat nang pagbabatuhin umano ng biktima ang kanyang tinutulugan.

Lumabas umano ito, at doon nakita ang biktimang may dalang tirador at akma siyang titiradurin, subalit nagwarning shot pa umano ito.

Akma parin umano siya nitong aatakihin, rason na kanya na itong pinagbabaril.

Kaagad namang dinala sa ospital ang biktima, habang tumakas ang suspek sakay ng motorsiklo papuntang Eastern Side ng Aklan.

Samantala, itinanggi naman ng biktima na may dala siyang tirador, at sa halip, iginiit na sasampahan ng kaso ang suspek kahit humingi pa ito ng tawad.

Nabatid na masama ang loob ng biktima sa suspek dahil sa pag ‘lay off’ o pagtanggal nito sa kanyang kapatid sa trabaho.

Samantala, nahuli naman ng mga pulis sa checkpoint sa Cabangila, Altavas ang suspek at kasalukuyang nasa kustodiya ng Numancia PNP para sa karampatang disposisyon.