DAHIL SA DATING ALITAN, DALAWA, NAGSAKSAKAN

Dahil umano sa dating alitan, sugatan ang dalawang lalaki matapos magsaksakan noong Septyembre 8, 2021, alas 5:30 ng hapon  sa Sitio Guinhambaran, Aranas, Balete.

Nakilala ang mga sugatang sina Edmer Prado, 35 anyos ng nasabing lugar, at Danilo Panganonong, 55 anyos ng Sitio Kutkot, Aranas, Balete.

Base sa inisyal na report, sinabuyan umano ni Panganonong ng kaning-baboy si Prado, na nagkataong nasa impluwensiya ng alak, kung kaya’t humantong ito sa rason sa komprontasyon.

Kasunod nito, bigla umanong sinaksak ni Panganonong si Prado na ikinasugat nito sa puwetan, hanggang sa nagpangbuno at nag-agawan sila ng patalim, dahilan upang masugatan sa kanang kamay ni Panganonong.

Kapwa isinugod sa ospital ang dalawa, subalit sinabi naman ng Balete PNP na kaagad ding inilabas ng ospital si Prado, habang ginagamot pa si Panganonong.

Kasalukuyan namang inihahanda ng Balete PNP ang kasong Frustrated Homicide na isasampa laban kay Panganonong na naka hospital arrest ngayon.

Samantala, isa pang lalaki ang inaresto na kinilalang si Lorenzo Inocencio, 52 anyos na kababaryo ni Prado. Ayon sa imbestigasyon, binugbog umano ni Inocencio si Prado sa halip na awatin ang dalawa.