DAHIL SA TONG-ITS, TATLO ARESTADO

Arestado ang 1 lalaki at dalawang babae alas-4:30 kaninang hapon sa Nalook, Kalibo, dahil sa tong-its.

Base sa report ng Kalibo PNP, kaagad silang nagsagawa ng Anti-Illegal Gambling Operation matapos makatanggap ng sumbong mula sa isang concerned citizen hinggil sa nagaganap na pagsusugal sa nasabing barangay.

Dito na naaktuhang naglalaro ng tong-its ang tatlo, at agad ding inaresto. Nakilala ang mga suspek na sina Teddy Tomasar, 57-anyos; Helen Dela Cruz, 61-anyos; at Melyn Cervantes, 59-anyos, na pare-parehong residente ng Nalook.

Kasunod nito, narekober ang 1 set ng baraha, kabuuang P243.00 na pera, gayundin ang mga upuan at mesang ginamit ng mga suspek sa pagsusugal.

Pansamantala naman silang ikinostodiya ng Kalibo PNP para sa karampatang disposisyon.